Meðfylgjandi er frumvarp til laga um breyting á lögum um bókhald, nr. 145/1994, með síðari breytingum.
Frumvarpið er flutt samhliða lagafrumvarpi til breytinga á lögum um ársreikninga.
Með frumvarpinu eru lagðar til breytingar sem leiðir af lögum nr. 79/2008, um endurskoðendur. Meginbreytingarnar eru í samræmi við breytingar í frumvarpi til breytinga á lögum um ársreikninga varðandi hlutverk endurskoðenda annars vegar og skoðunarmanna hins vegar.
Einnig er lagt til að heimild félaganna til að hafa texta bókhaldsbóka og ársreikninga á dönsku eða ensku í stað íslensku verði víkkuð út til annarra félaga en þeirra sem hafa heimild til að hafa reikningsskilin í erlendum gjaldmiðli, svo og ákvæði varðandi geymslu bókhaldsgagna erlendis í allt að sex mánuði.
Þá eru loks lagðar til breytingar á ákvæðum er snúa að prófagjöldum fyrir þá einstaklinga sem vilja fá viðurkenningu sem bókarar að því leyti að ekki verði lengur innheimt bæði námskeiða- og prófagjöld heldur verði eingöngu innheimt prófagjöld.. Breyting þessi gerir r ráð fyrir því að viðkomandi verði heimilt að fara í próf án þess að sækja námskeið, hafi sá hinn sami unnið við bókhald í mörg ár, og að fleiri skólum en nú verði heimilt að bjóða upp á námskeið sem gefi möguleika á að taka próf til viðurkenningar.
Frumvarp þetta var áður lagt fram en ekki afgreitt. Frumvarpið er nú lagt fram að nýju lítillega breytt með hliðsjón af þeim athugasemdum sem efnahags- og skattanefnd bárust frá hagsmunaaðilum.
