Nýting skattkorts maka

Gjaldandi nokkur krafðist þess að ógilt yrði ákvörðun ríkisskattstjóra  um að hafna umsókn hans um að fá að nýta skattkort eiginkonu sinnar og að hann fengi ofgreidda skatta til baka. Þau hjónin nutu örorkulífeyris, greiðslna úr lífeyrissjóðum og atvinnuleysisbóta hérlendis en voru búsett erlendis. Í dómi héraðsdóms var fallist á kröfuna um að felld yrði úr gildi fyrrgreind ákvörðun ríkisskattstjóra sökum þess að hún hefði ekki verið samrýmanleg skuldbindingum ríkisins  samkvæmt EES-samningnum, svo og að gjaldandinn  ætti rétt á endurgreiðslu þess ofgreidda  tekjuskatts sem ekki væri fyrndur. Málinu var áfrýjað  til Hæstaréttar, sem kvað upp úrskurð að eigin frumkvæði  um öflun álits EFTA-dómstólsins um skýringu samnings um Evrópska efnahagssvæðið varðandi nokkra þætti málsins  þar sem niðurstaða hans kynni að hafa áhrif á úrslit þess.